العقدة الدونية تجاه الأمة المصرية وكل ما هو مصري
..
"تحيا ماسر
دي أكيد Egypt مش مصر"
وغيرها من الكلمات والجمل اللي بيتم استخدامها من بعض المصريين للأسف للسخرية والتهكم على كل ما هو مصري !
سنوات طويلة من الدونية الطاغية على بعض المصريين ع كافة الأصعدة !
وده بسبب الإهمال وغياب الرقابة وانتشار الفساد ع مدار عشرات السنين
وده غير المؤامرة المحاكة ع عقل الإنسان المصري ووعيه لصناعة كائن مصري ممسوخ فاقد الكرامة كل همه البحث عن المأكل والمشرب !
المؤامرة دي تضمنت :
تهميش الهوية الأصلية ل مصر (هوية المصريين القدماء)
تكفير الحضارة المصرية القديمة ومحاولة تشويهها
فرض الثقافة العربية الدخيلة ع المصريين ومحاولة تجميلها بكل الطرق
اختراق الفن المصري من أشباه المخرجين وصناعة دراما بعيدة عن الواقع تحقر في الشخصية المصرية
تدني مستوى الإعلام المصري بنشر السلبيات الدائمة عن مصر بالمقابل الترويج الايجابي لبعض دول الجوار ع حساب مصر
مخطط قائم لسنوات لهزم ثقة الإنسان المصري وتحطيم معنوياته بداية من جعله إنسان بيبرأ من تاريخه وهويته وبيحاول يدور ع قوميات وجذور تانية عشان ينتسب ليها !
رغم ان هو المصري وهو الأصل والجذر ..
مخطط خلقلنا شخصية مصرية مهزوزة عندها احساس دائم بالدونية وعدم الاستحقاق !
اما اليوم تغيرت الكفة مع توجه الدولة المصرية والنظام الحالي في الاعتزاز والفخر بكل ما هو مصري ماضيا وحاضرا
ودورنا ك شباب واعي إننا نمشي في طريق استعادة الهوية والشخصية المصرية الحقيقية اللي أثبتت عظمتها دايما في مختلف المجالات وده اللي خلاها محط مؤامرات قذرة من أشباه الجنسيات الأخرى معدومة الأصل والهوية !
النهاردة مع الجمهورية الجديدة وظهور التيار القومي المصري بنعلن إن مصر هتمضي في طريق استعادة عزتها وهيبتها
وآن الأوان إن المصري يفوق من غفلته ويستعيد فخره بمصريته وبأجداده وبحضارته العظيمة
آن الأوان تعلموا ولادكم إنهم أحفاد أعظم حضارة عرفتها البشرية وإن دي أرضهم وإن جذورهم أعمق من التاريخ ذات نفسه
آن الأوان إن المصريين يدركوا عظمتهم ومساهمتهم العظيمة في الحضارة الإنسانية ويتلاشى من عقولهم كل مصطلحات الدونية والانبطاح !
وخليكم دايما فاكرين إن عزة النفس المصرية أقوى سلاح في وجه أعداء مصر والمصريين
وأول خطوة من خطوات بناء مصر الحديثة العظيمة