مصر
الحقيقة كل ما آجي أفتح الكلام فـ الموضوع ده, أكسكس وألاقيني مش فاضي لوجع الدماغ, لأنه بيعطلني عن حاجات ممكن الواحد ينجزها, كتاب أو قاموس أو رواية أو حاجات من الشغل بتاع أكل العيش!
انما مضطر عشان خاطر صديقي Ihab Kassem, عمللي منشن فـ بوست بيتكلم عن أصل اسم مصر!
الجماعة اللي بيتكلمو فـ الموضوع ده, واخدين سكتين:
• سكة العروبة والإسلام: ان الإسم أصله عربي عشان اتذكر فـ التوراة والقرآن!
المضحك بقا ان جماعة كبيرة من بتوع الطريق ده, استخسرو يكون الإسم المذكور فـ القرآن هوه نفس اسم البلد اللي احنا عايشين فيه دلوقتي, وشغالين فـ ترويج نظريات مصر بتاعت اليمن ومصر بتاعت الأردن, ومصر بتاعت الجزيرة .. لخ!
• سكة آسيا والتوراة: إن الإسم أصله آشوري بابلي آرامي عبري ..لخ!
الصراحة إن الإتنين معذورين, بفرض حسن النية, وإن التعصب الديني مش هوه بس السبب فـ كل سكة من السكتين دول!
- طب معذورين ليه؟
لأن إسم مصر – بتصاريفه- ظاهر أوي فـ الكتابات الشرقية, مصارو/ مصيرو/ مصرايم .. لخ, وبعدين بيظهر فـ التوراة فـ القرن الأول أو التاني قبل الميلاد, لغاية ما يوصل للقرآن الكريم فـ القرن السابع الميلادي ويبقا بنفس الشكل اللي بنكتبه كلنا دلوقتي "مصر"!
فـ الناحية التانية, ناحية الغرب الجغرافي والثقافي, هنلاقي إسم "ايجبت" بتأثير الأصل اليوناني "ايجيبتوس"!
- طب الحل ايه؟
الحل يبدأ بأن الثقة ترجع للمصريين فـ بلدهم وحضارتها وثقافتها!
إززاي؟
1. لو آمنت واتأكدت ان مصر بدأت وبعد كده بدأ العالم, لو آمنت واتأكدت يبقا سهل أوي انك متسدأش إن فيه حد اختار لنا اسمنا وكلامنا, زاي الكلام اللي كتير من المصريين بيرددوه دلوقتي من ان: مصر بتتكلم عربي واسمها اسم عربي! لدرجة ان وزارة الهجرة بكل سخافة بتروج لبرنامج اسمه: اتكلم عربي, ده طبعن غير الخيبة الدستورية التقيلة عن عروبة مصر!
2. يبقا اللي مش مآمن ومش متأكد من ريادة مصر وحضارتها ميكملش معانا, وميتعبش نفسه فـ قراية البوست, وبعد كده يتعبنا احنا فـ حوار عقيم ممنوش فايدة!
3. مصر لها أكتر من إسم –حوالي عشرين- بأكتر من وصف وكناية, رسمي وشعبي, وكلهم ثابتين فـ الآثار المصرية, يعني مش بس "كيميت" لأ فيه "وجات’" و"باوة" و"بياوة" و"بحدت" و"ازتي" و"تا-مري" و"طاوي" و"باقة" ... لخ!
4. بإختصار أسامي مصر القديمة فيها أسامي رسمي ودول ممكن نحصرهم فـ أربع أسامي: كيميت/ تامري/ طاوي/ باقة.
5. وفيه كمان أسامي الأوصاف الشعبية, ومنهم الإسمين المشهورين دلوقتي, اللي كان حظهم أحسن بكتير فـ الخلود والشهرة لغاية دلوقتي, الإسم الشعبي الأولاني: ايجيبت, والإسم الشعبي التاني: مصر!
6. الإسم الشعبي الأولاني: ايجيبت, أصله وجدره من إسم النتر "جب" اللي اتجوز النترة "نوت", وبقا من أساميها "جبت" بتاء التانيث واضافة ألف أداة تعريف, يعني الشعب كان بيوصف بلده, بإعتبارها السما "نوت" اللي مرتبطة بالأرض "جب" .. التصريفة اليوناني "ايجيبتوس" اعتمدت ع الإسم الشعبي "جبت", وبنفس الطريقة اتصرفت "جبت" لـ "قبط" عند العرب .. حكاية "حتكابتاح" وودنك منين يا جحا دي عمري ما اقتنعت بيها مهما كان اسم اللي كاتبها, لأنها بعيدة ومش منطقية بالمقارنة مع الجدرين المباشرين: "جب" و"جبت"!
7. الإسم الشعبي التاني: مصر, وتضحك أوي لما تلاقي ان كل الناس اللي كتبت فـ الموضوع –باستثناء شريف السركي - مستبعدة الإسم ده من تاريخ مصر وكأنه جرب أو طاعون!!! طب قولت انك تضحك أوي ليه؟ عشان الإسم اللي كلهم مستعرين منه ده كان موجود فـ اسم من شهور السنة من سنة 2000 ق.م, واتذكر رسمي ع الأقل من سنة 1400 ق.م فـ رسايل تل العمارنة, مع الملك أمنحتب التالت مع أنليل الأول ملك بابل: كده بالنص: من أمنحتب الأول ملك "ميسورا/ ميصورا/ مصرا" ... لخ! فـ حين الكلام اللي خد صفحات كتير كان كله بيبدأ مع "ايجيبتوس" الإغريقي اليوناني من سنة 300: 400 ق.م يعني اسم "مصر" له جدر أثري سابق "ايجيبتوس" بألف سنة ع الأقل!
الصورة لجدر من جدور اسم "مصر" موجود ووصل لنا فـ اسم شهر "مسرا" من شهور السنة المصرية, بمعنا ميلاد رع, وبالمناسبة الإسم موجود فـ أسامي الشهور من عهد الملك أمنمحات الأول يعني 2000 سنة ق.م, ع الأقل!
منقول