كنتم فى حالة قلق على مصر ايام الاخوان.. وطمناكم.. وحصل
كنتم خايفين نبعت جنود فى اليمن وطمناكم.. ورؤية مصر بالنسبة لليمن هى اللى مشيت
كنتم خايفين على مضيق باب المندب وغلقه بما يؤثر على مشاريع محور قناة السويس وقناة السويس الثانية.. وطمناكم .. ورؤية مصر فى البحر الاحمر هى اللى انتصرت
كنتم خايفين على غاز شرق المتوسط.. وقلنا لكم العلاقات مع اليونان وقبرص هى المفتاح .. وتركيا هي اللى هتيجي في الاخر تتوسل نصيبها من غاز المتوسط.. وحصل
كنتم خايفين لسوريا تتحول الى جمهورية اخوانية.. او ولاية داعش.. او حتى معارضة موالية لتركيا تستولى على الحكم فى دمشق.. او انه تركيا تفوز بولاية ضخمة فى سوريا.. وطمناكم .. وكل دا سقط ولم يظفر اردوجان الا بقنبلة اسمها ادلب فيها 100 الف إرهابي..
كنتم خايفين لارهاب شمال سيناء يخلى سيناء عاصمة مصرية لداعش، او يتمدد الى باقى محافظات مصر .. وطمناكم .. وشفنا جيشنا بيسطر ملحمة عجزت عنها جيوش الغرب فى افغانستان والعراق قبل جيوش المنطقة فى سوريا وليبيا واليمن..
كنتم خايفين على الصحراء الغربية وطمناكم.. وشفنا المخابرات المصرية بتجيب هشام عشماوي من جوا ليبيا وبتفكك تنظيم مرابطون وتنهي حلم الجيش المصري الحر
كنتم خايفين من النظام الاخواني فى السودان وقلنا لكم صبراً .. وحصل
كنتم فى حالة قلق أيام كورونا .. واتقال لكم الضحايا هيبقوا بمئات الالاف، وميدان التحرير وميدان رمسيس طول هيبقوا اصغر مستشفي ميداني .. وقالوا لك الأقصر هي ووهان مصر .. وقالوا لك يعني النظام الصحي في بريطانيا وإيطاليا واسبانيا وفرنسا وامريكا والصين وايران وتركيا والكويت يتضرب ومصر لأ .. وقلنا لكم رجالتنا الأطباء والعاملين في القطاع الطبي غير اى حد .. وقلنا لكم الإدارة المصرية لملف كورونا مختلفة عن العالم، ايه المشكلة انك تبقا احسن من العالم ؟ .. وحصل.
لما يكون اللى بيكلمك عنده تاريخ من الصدق .. واللى بيعوي ضد بلدك عنده تاريخ من الأكاذيب والزيف .. زيف شخصي ومهني ومفيش في الــ CV بتاعه حاجة حقيقية أصلا دا لو فيه CV من أساسه، دا قبل ما نروح لتاريخ الزيف والاكاذيب في كافة شؤونك المحلية والإقليمية والدولية .. يبقا انت قدام حاجة من الاتنين.
يا تشغل عقلك.. وتفهم انه اللى قالك ع الصح عشر سنين واكتر مش هيتوقف عن انه يقولك الصح فجاة اول ما الحرب الأوكرانية تبدأ ويحصل الازمة الاقتصادية اللى مصر اصلاً بدأت رحلة التعافي منها..
او تشغل غواية الدونية واحتقار الذات وجلد النفس والمازوشية والشعور بالضآلة والانحطاط والشعور بالدفء وسط السوقة والغوغاء والشرذمة، عندك جو الحنين الى الكلة وسكربتات مش هتفيد الا الاخوان حتى لو كان اللى متسرح بها كان ضد الاخوان لفترة كنوع من الخلايا النائمة، وقتذاك عندك خرابة مدعي المعارضة اللى مفيش جملة في حياتهم وبيتهم وعن نفسهم طلعت صح قبل ما نتكلم عن الشأن العام.
فالاختيار ليك .. صيانة كرامة عقلك ليست مسؤوليتي.
#منقول