مرحبا بك في منتدى الشرق الأوسط للعلوم العسكرية

[Lion84]

كتبت بوست إنك تقدر تتعامل مع الأواجل . لكن ما تقدرش تمنعها
فكان السؤال المنطقي هو . أتعامل معاها ازاي ؟!
فخلينا نجاوب في البوست ده
.
#نصيحة_من_خبير
.
حضرتك إعمل بيان ب ١٠٠ عميل
إنتقي أفضل ١٠ منهم
.
هانتقيهم ازاي ؟!
إعمل جلسات مع مدراء المبيعات في مجالك . ومندوبين المبيعات في منطقتك . واعرف منهم تقييم العملاء بناءا على تجاربهم العملية معاهم
.
عرفت أفضل ١٠ عملاء
ابتدي بيع ليهم تحت سقف ائتمان
.
يعني انتا شغال في بضاعة ب ٥ مليون جنيه
قول أنا أكبر قيمة للائتمان اللي هارميه في السوق هو مليون جنيه مثلا
.
هقسم المليون جنيه ده على أفضل ١٠ عملاء
يبقى كل عميل هاعطيه بضاعة على سبيل الائتمان ب ١٠٠ ألف جنيه
دا اللي بيسموه الأرضية أو الفرشة
.
نزلت ل ١٠ تجار كل واحد بضاعة ب ١٠٠ ألف جنيه
مكسبي في البضاعة دي مثلا ١٠ آلاف جنيه
والتحصيل على شهر
.
بعد شهر هروح لكل تاجر ببضاعة جديدة ب ١٠٠ ألف جنيه
هحصل ال ١٠٠ ألف جنيه القديمة
وهسيب عنده بضاعة جديدة ب ١٠٠ ألف جنيه
كده أنا كسبت منه ١٠ آلاف جنيه
.
هافضل شغال كده لحد ما اكسب منه ١٠٠ ألف جنيه
أبقى كسبت من ال ١٠ تجار المليون جنيه اللي انا كنت راميهم في السوق
.
كده افتح في تاني عشر تجار من ال ١٠٠ تاجر
وآخد معاهم نفس الجولة في ١٠ شهور جداد
.
خلال ال ١٠ شهور الأولى باعرف مين تاجر أمين
فبارفع له سقف الائتمان ل ٢٠٠ ألف
ومين نص ونص . فباخفض له سقف الائتمان ل ٥٠ ألف
ومين حرامي . فبحاول استرد اللي اقدر عليه من فلوسي اللي عنده . وبعدين اوقف التعامل معاه
.
وكذلك تاني شريحة من ال ١٠٠ تاجر
وتالت ورابع وعاشر شريحة
.
هتقول لي كده انا محتاج ١٠٠ شهر . يعني ٨ سنين
آه وماله . هوا انتا مستعجل ولا حاجة ؟!
.
هتقول لي فيه تاجر عارض عليا ربح أكبر مقابل إني أرفع له سقف الائتمان ل ٢٠٠ ألف
هقول لك لأ
.
قلت لك آفة التجارة هي #الطمع_والاستعجال
.
تاني بقول وأعيد وأكرر بدون ملل
التجارة هي إدارة السيولة . مش المنتجات
.
اللي بيشتري بصل وبيبيع بصل . هوا بيشتري فلوس وبيبيع فلوس
دوره هو إدارة حركة الفلوس . مش حركة البصل
.
أخيرا . إيدك ورجلك وعينك وعقلك وقلبك فيما سبق هو . المحاسب بتاعك
.
وهات له مراجع يراجع عليه كل أسبوع
ومكتب مراقب حسابات خارجي يراقب عليه وعلى المراجع كل شهر
.
وهات برنامج ليك انتا يتابع كل ده ويطلع لك تقارير تقرأها وانتا في الكافيه بالليل
.
إصرف على الحسابات . واخسر في المصاريف عليها . أحسن ما تخسر من الحسابات نفسها
.
إنتا بتدير سيولة . مش بصل

 

[Lion84]

#الكلام_النظريّ_جميل_لكنّه_مش_عمليّ
-
دي هبدة بيهبدها الفشلة عشان يمدحوا تصرّفاتهم الخاطئة بإنّها عمليّة
-
والحقيقة أنا مش عارف إيه ميزة إنّ تصرّفات تكون عمليّة أو نظريّة !!
أنا اللي اعرفه إنّ التصرّفات بتبقى حلوة لمّا تكون ليها نتائج إيجابيّة
لكن تصرّفات حضرتك عمليّة وبتخسّرك - بقت جميلة من أنهو اتّجاه يعني ؟!!!
ولّا مجرّد إنّك بتنفّذها - فهيّا كده بقت عمليّة ؟!!!
-
عمليّة يعني ليها نتيجة يعني ؟
ولّا عمليّة يعني انتا بتعملها ؟!!
-
الكلام النظريّ جميل وهوّا نظريّ - وجميل وهوّا عمليّ
لإنّ ما حدّش بيقعد مع نفسه في البلكونة في الطراوة كده ويخترع كلام نظريّ
-
الكلام النظريّ اللي مش عاجبك ده هو خلاصة تجارب شركات ناجحة
كلّ ما في الموضوع إنك مش قادر تنفّذه - لإنّه محتاج التزام من مستوى أعلى من مستواك في الالتزام
فبدل ما تقول دا كلام أكبر منّي وانا ما اقدرش اطبّقه - فبتقول دا كلام نظريّ !!
-
لمّا اقول لك مثلا العامل المستهتر ارفده وعيّن واحد بداله
أسهل حاجة عليك إنّك تقول دا كلام نظريّ
لإنّ البديل إيه ؟!
-
البديل إنّك تقول إنّك فاشل
فحضرتك طبعا مش هتقول على نفسك كده - الأسهل ليك إنّك تقول إنّ كلامي نظريّ وخلاص
-
ما البديل بالنسبة لك معناه
-
1 - عمل نظام متابعة دقيق للعمّال لتحديد مين منهم الجادّ ومين منهم المستهتر - يعني نظام KPIs
فانتا أقلّ بكتير من إنّك تعمل نظام KPIs
إنتا مشغّل طابونة أساسا - هتروح تدرس يعني إيه KPIs
وبعد ما تدرسه وتفهمه أصلا - مش هتعرف تعمله - يبقى نحرج نفسنا ليه ؟!!
-
2 - تجهيز صفّ ثاني من العمالة المستعدّة لشغل الوظيفة اللي هتفضى في أسرع وقت
وده معناه إنّ حضرتك محتاج تعمل نظام موارد بشريّة
-
ونظام الموارد البشريّة ده يلحم فيه نظام تدريب - ما هو العمّال اللي هيجيبهم بتاع الموارد البشريّة دول محتاجين يتدرّبوا
فانتا أساسا يدوب بتجيب مصاريفك - وكويّس إنّ الدكّانة اللي انتا فاتحها ما قفلتش - هتروح تعمل موارد بشريّة وتدريب
-
يبقى إيه الأسهل ؟!!!
الأسهل إنّك تقول إنّ يا عمّ دا كلام نظريّ - خلّينا في العمليّ بتاعنا
إحنا عاملين اللي علينا - بسّ هنعمل إيه في العمّال ولاد السيّدة غير النظيفة
آدينا مستحملين لحدّ ما المخروبة دي تجيب دلفها وخلاص
-
إنتا يهمّك صورتك قدّام نفسك إنّك تكون غير مقصّر - دي اسمها ميكانيزمات الدفاع الذاتيّ
دا أهمّ بالنسبة لك بكتير من الربح
-
يقال أنّ الثعلب القزعة دخل الجنينة - فلقى العنب الجميل الناضج عالي - ولقى الليمون واطي
فالثعلب لإنّه قزعة - أكل من الليمون لإنّه ما طالش العنب
-
خرج الثعلب من المزرعة - فقابله أصدقاؤه وقالوا له ( تسيب العنب وتاكل الليمون ؟! )
فقال لهم الثعلب ( أصل العنب مرّ والليمون حلو )
-
ممكن تقرأ القصّة دي على سبيل الفكاهة - وتقول شوف التعلب بيستعبط ازّاي
بينما الحقيقة إنّ التعلب ما عملش حاجة - دي مجرّد قصة خياليّة
لكن قصّتك انتا حقيقيّة
-
قصّتك لمّا كمّلت في نفس الخطأ اللي بتعمله - وتركت الصواب - وقلت على الخطأ إنّه عمليّ وجميل - وقلت على الصواب إنّه نظريّ !!!
-
الإنسان نفسه مبرمجة إنّها تشوف نفسها كويّسة دايما - حتّى الحرامي - بيشوف نفسه هو الشخص اللي بيقرّ العدل في الأرض بأخذ الأموال من الأغنياء الحراميّة
-
طيّب لو هيسرق فقراء ؟!
ولو - هوّا جميل بردو - والفقراء دول ولاد سيّدة غير نظيفة مجرمين - ويستحقّوا إنّي أسرقهم
-
الحرامي لو شاف نفسه حرامي - هيموت
كذلك الشخص الفاشل - بيشوف نفسه شخص جميل - لإنّه بيطبّق الكلام العمليّ
عمليّ بامارة إيه يعني - ما تعرفش !!!
-
والدي الله يرحمه كان ليه صديق اسمه عمّ عطا الله
عم عطا الله ده كان بيشرب سجاير وشيشة وليلة بيضا يعني
فوالدي الله يرحمه في يوم قال له - ما تبطّل السجاير والشيشة يا عطا الله
فقال له عارف يا أستاذ أحمد - أنا طول عمري باشرب الحاجات دي
فوالدي الله يرحمه قال له - ما انتا صحّتك منيّلة بنيلة يا عطا الله !!
-
يعني يا فرحتي طول عمرك بتشرب سجاير وشيشة - بقت صحّتك كويّسة يعني فنقول إنّ السجاير والشيشة كويّسين ونتمسّك بيهم
-
وانتا يا صاحب المصنع ياللي طول عمرك ماشي بالكلام العمليّ - إيه أخبار الأرباح معاك - لعلّها تكون أرباح خياليّة يعني فنقول إنّ العكّ العمليّ بتاعك أحسن من العلم النظريّ
-
لو العكّ بتاعك بيجيب أرباح - هندخّله في العلم أصلا
ما هوّا العلم اتعمل ازّاي أصلا ؟! ما هو اتعمل كده
-
اتعمل بإنّنا شفنا الناس الناجحين نجحوا ازّاي - فيه ناس خدت النجاح ده وقلّدته ونجحت بيه وما كتبتش ورقة وراها
وفيه ناس ركّزت مع قواعد النجاح دي وكتبوها في ورق - فبقى دا اللي اسمه العلم - اللي انتا بتقول عليه نظريّ ده
-
نظريّ ازّاي يعني إذا كان هوّا خلاصة التجارب العمليّة ؟!!!
-
موضوع إنّك تلاقي واحد فاشل بينتقد العلم ده هو موضوع مضحك جدّا
ولو عاوز تقفشه - ببساطة - قول له الكتب بتقول إيه ؟!
وأتحدّى لو قدر يقول لك الكتب بتقول إيه ؟!!!
-
هوّا ما يعرفش الكلام النظريّ اللي هوّا بينتقده ده بيقول إيه أصلا
هوّا بينتقد الكتب وخلاص عشان يراضي ضميره بإنّه ماشي صحّ وخلاص
حتّى لو بيخسر - مش مهمّ اخسر- المهمّ أكون قدّام نفسي باخسر بسبب الآخرين - مش بسببي أنا
انا تمام وباعمل اللي عليّا وبنفّذ الشغل العمليّ

 

[Lion84]

دا بوست بيناقش فكرة إن أكبر الدول المصدرة في العالم . هيا هيا أكبر الدول المستوردة
.
الشاهد من البوست لسه مش هاشرحه دلوقتى
.
لكن البوست الحالي باكتبه عشان أناقش فكرة منتشرة عند النارس . وكنت متوقعها في الردود . وبالفعل لقيتها متكررة وبكثرة
.
الفكرة دي بسميها ( #أمريكا_التي_في_خاطري_وفي_فمي )
.
يعني إيه ؟!
يعنى الناس بتتخيل الدول المتقدمة على أساس خيالنا الشخصي عن ( كيف يجب أن تكون الدولة المتقدمة )
وليس ( كيف هي الدولة المتقدمة في الواقع فعلا )
.
ناس كتير علقت وقالت إن معنى إن الدول المتقدمة بتستورد كتير . وبتصدر كتير . إنها بتستورد خامات كتير . وبتصدر منتجات تامة الصنع كتير
.
والسؤال هو . حضرتك جبت التصور دا منين ؟!
.
الحقيقة هي إن حضرتك جبت الفكرة دي بناءا على نظرية ( أمريكا التي في خاطري وفي فمي )
.
حضرتك متصور إن الدولة المتقدمة #أكيد بتستورد خامات وتصدر منتجات
وبناءا عليه بتحول التصور دا لحقيقة
والأنكت من كده إنك بتبتدي تبني قراراتك بناءا على اللا حقيقة دي
والأنكت والأنكت لما تلاقى قراراتك ما بتجيبش نتائج . أو بتجيب نتائج سلبية !!!
.
أمريكا أكبر دولة مستوردة في العالم . مين قال لك إنها بتستورد خامات ؟!
ما هي بتستورد منتجات تامة عادي
الشعب الأمريكي أكبر شعب عويل مستهلك في العالم
.
الصين تاني أكبر مستورد في العالم . عرفت منين إنها بتستورد خامات فقط . وبتصدر منتجات فقط . ما هي بتستورد منتجات تامة الصنع عادي . وبتصدر خامات عادي بردو
.
اسأل الناس اللى سافرت لدول متقدمة عن #مساوء الدول المتقدمة
وطلع من دماغك فكرة الخيال المثالي عن هذه الدول
.
ما تبقاش ملكي أكتر من الملك
.
أخيرا
لسه الشاهد الرئيسي من الإحصائيات المذكورة ما قلتوش
لكن ممكن البوست دا يقرب حضرتك من استنتاج الفكرة المقصودة !!
ولا إيه ؟!!

 

[Lion84]

رفعنا الصورة دي امبارح عشان نشوف تعليقات الناس عليها
لكن للأسف معظم الناس ما وصلتش للهدف الأصليّ المقصود من هذه الصورة
فخلّينا النهارده نوضّح إيه أهمّ الاستدلالات من الصورة دي
-
أوّلا /
أكبر دول مستوردة في العالم هي ( أمريكا - الصين - ..... )
إذن
حضرتك يوم ما تحبّ تصدّر - يبقى أوّل دول تستهدفها هي أمريكا والصين
-
معظم الناس عقلها ما راحش للفكرة دي -اللي هوّا انتا عاوزني أنا أصدّر لأمريكا والصين - دانا غلبان
-
تبقى الإحصائيّة بتقول له إنّ دي أكبر دول مستوردة في العالم - لكنّه يتعامى عنها تمامااااااااا - ويخضع لإيه ؟! يخضع لمؤثّر نفسيّ - مؤثّر نفسيّ فقط
-
أيّام المغول - كان الجندي المغوليّ يقابل جماعة من المسلمين وهوّا ما فيش معاه سيف - فيقول لهم اقفوا مكانكم لحدّ ما أروح اجيب سيف - فيقفوا مكانهم - فيروح يجيب سيف وييجي يقتلهم !!!
طيّب ليه همّا ما قتلوهوش ؟!!! هوّا ما فيش معاه سيف - وهمّا أكتر منّه
طيّب ليه ما جروش حتّى ؟!!!
-
دا بالظبط اللي حاصل حاليا - تبقى الإحصائيّة بتصرخ وبتقول لك أكبر دولة مستوردة في العالم هي أمريكا - لكن خيالك مقفول تماما عن فكرة التصدير لأمريكا
-
كذلك الصين - فيه شركات مصريّة كتير بتصدّر للصين - أنا شخصيّا قعدت مع صاحب شركة قال لي أحسن شغل تصدير عملته كان للصين - 1.4 مليار إنسان يا هندسة - سوق مهول
-
لكن بردو انتا خيالك عمره ما هيروح لإنّك تصدّر للصين - ولا حتّى هتسأل أصدّر لها ازّاي
إنتا عندك حاجز وهميّ
-
عملوا تجربة جابوا فيها برطمان - وحطّوا فيه براغيت - وقفلوا البرطمان عليهم - وسابوهم فترة
البراغيت بقت تنطّ - تخبط في الغطاء - وتنزل تاني
-
بعد فترة - فتحوا غطاء البرطمان - وكانت النتيجة إنّ البراغيت فضلت تنطّ داخل البرطمان وما تطلعش منّه !!! لإنّهم متخيّلين إنّ الغطاء ما زال موجود !!!
-
دي حواجز وهميّة - وللأسف الناس بتخضع ليها زيّ البراغيت بالظبط !!!
-
السبب الثاني من إنّك بتصرف نظر عن التصدير لأمريكا والصين - هو إنّك متخيّل إنّ دي دول متقدّمة - تبقى أكيد بتستورد خامات - وتصنّعها - وتصدّرها في صورة منتجات تامّة
-
والسؤال هو ( حضرتك جبت التصوّر ده منين ؟! )
-
أقول لك أنا ؟!
حضرتك جبت التصوّر ده من فكرة ( أمريكا التي في خاطري وفي فمي )
-
يعني انتا بتبني تصوّرك عن الدول المتقدّمة - بناءا على ما تتخيّله أنت عن الحالة التي يجب أن تكون فيها الدولة المتقدّمة - مش بناءا على الحقيقة اللي فيها الدولة المتقدّمة بالفعل
-
فانتا خيالك بيقول لك إنّ المفروض الدولة المتقدّمة دي تكون بتستورد خامات وبتصدّر منتجات
فخلاص بتقوم طابع ده على الواقع - وصانع واقع افتراضيّ من خيالك الخاصّ إنّه أكيد دي دول مش بتستورد منتجات - دول بيستوردوا خامات فقط - وأنا ما بصنّعش خامات - يبقى دول مش عملائي
-
بينما الحقيقة إنّ أمريكا والصين بيستوردوا منتجات عادي
بدليل !! إنّ رقم الواردات والصادرات متقارب عندهم
-
يعني !
لو همّا بيستوردوا خامات وبيصدّروا منتجات - هتلاقي رقم الصادرات أضعاف رقم الواردات
لإنّهم بيستوردوا خامة بدولار - يصنّعوها ويصرفوا عليها دولار ويبيعوها ب 3 دولار على الأقلّ - يبقى المفروض تلاقي رقم الصادرات أكبر بمراحل من رقم الواردات
بينما الحقيقة مش كده - الأرقام قدّامك اهي - همّا في الحقيقة بيستوردوا خامات ومنتجات - وبيصدّروا خامات ومنتجات عادي جدّا
-
أنا أيّ منتج بادخل اشوف إحصائيّات استيراده وتصديره من موقع تريد ماب - بشوف في الأوّل مين أكبر مستوردين ومصدّرين ليه على مستوى العالم - حتّى لو النقطة دي مش داخلة في دراستي - لكن من باب الفضول
-
دايما بلاقي أمريكا في قمّة قائمة المستوردين لهذا المنتج !!
شباشب بقى إندومي بسكويت - هتلاقي أمريكا أكبر دولة بتستورد أيّ حاجة - حتّى لو كانت سجاجيد صلاة !!!
-
النكتة إنّ أمريكا لمّا بتستورد حاجة - بتستوردها غالية جدّا
يعني اللي يخلّيك تصدّر منتج لليبيا مثلا أو السودان و العراق بدولار - لو صدّرته بجودة أعلى شويّة لأمريكا - يعني هيكلّفك 2 دولار - هتبيعه لأمريكا ب 5 دولار - هياخده التاجر الأمريكيّ يبيعه للشعب الأمريكي ب 15 دولار
-
همّا متفاهمين على ده - الحاجة اللي بدولار هنا - هتلاقيها ب 15 دولار هناك عادي - والشعب بيشتريها عادي - همّا متفاهمين على ده
وساعة الشغل اللي هنا بدولار - عندهم ب 15 دولار عادي
فهمّا بيقبضوا كتير جدّا - وبيشتروا الحاجات غالية جدّا - وآخر الشهر مرتّبهم بيخلص عادي - عشان ينزلوا الشغل تاني طبعا - دا سيستم يا باشا
-
والأنكت من كده إنّه ممكن يشتري الحاجة دي - ويرميها وهيّا لسّه شغّالة - ويشتري حاجة تانية عشان بسّ تغيير في الشكل
شعب عويل مستهلك بشكل جبّاااااااااار
تقوم تسيب كلّ ده - وتحرق جاز مع الدول اللي ضاربها السلك أصلا - الناس اللي لو اشترت منتج مش هترميه إلّا لمّا يبوظ - ولمّا يبوظ بيصلّحوه أصلا
-
تاني بعيد وبكرّر - إنّ الحاجز اللي عند الناس هو حاجز وهميّ
زيّ القيد الوهميّ اللي كان بيقيّد الناس أمام الجنديّ المغوليّ
-
أنا شفت فيديو لفارس ساحب حصان من غير لجام !!!
الفارس فقط ماشي قدّام الحصان - وحاطط إيده مكان اللجام - والحصان ماشي وراه كإنّه مربوط في لجام فعلا - بينما ما فيش لجام ولا حاجة !!!
-
أخيرا بالنسبة للنقطة الأولى والأهمّ - شوف باقي سلسلة الدول المستوردة - هتلاقيهم كلّهم دول متقدّمة - استهدف دول في تصديرك بردو - مش أمريكا والصين بسّ يعني
-
الاستدلال الثاني من نفس الجدول - إنّ ما فيش حاجة اسمها إنّ التصدير حلو والاستيراد وحش
مين قال ده ؟! وقاله فين في صفحة كام في كتاب الاقتصاد ؟!!!
-
أيّ دولة في العالم بتستورد عادي وبتصدّر عادي
لو قدّامك فرصة للاستيراد - استورد - إنتا كده مش خاين للوطن ولا حاجة
-
وأنا كحدّ بتاع صناعة - هشجّعك جدّا
لإنّك لمّا تستورد النهارده - بكره هيبقى معاك راس مال - وهتبتدي تحسّ إنّك بتستورد الحاجات بأغلى ممّا تتكلّف - فهتجيلي عشان تصنّعها بشكل محلّيّ - وانتا معاك راس المال الكافي لعمل المصنع
فلو عاوز تستورد النهارده - أنا بشجّعك بشدّة - كلّها سنتين تلاتة وتجيلي عشان تصنّع - نظريّة التوستر
-
الاستدلال الثالث /
إنّ مصر مش دولة مستورد ولا حاجة
لإنّه ببساطة - هنستورد منين يا حسرة ؟!! إحنا ما عاناش فلوس نستورد بيها أصلا - هههههههه
-
إحنا كلّ وارداتنا شاكب راكب بمواصلاتنا لا تتعدّى ال 100 مليار دولار
بينما أمريكا بتستورد قدّنا ب 33 مرّة !!!
-
فإذا علمت أنّ عدد سكّان أمريكا قدّنا 3 مرّات فقط
فده معناه إنّ المواطن الأمريكيّ بيستورد 11 ضعف ما يستورده المواطن المصريّ - وفي الآخر يقولوا علينا احنا شعب مستهلك !!!
-
فبلاش جلد للذات
أيوه عاوزين نصدّرأكتر؟! أيوه فعلا
لكن ده من منطلق إنّنا عاوزين نكون أحسن - مش من منطلق إنّنا شعب عويل وما بيشتغلش
-
المفاهيم دي محتاجة تتظبّط عند الناس - فنفسيّة الناس تتحسّن
-
بدل ما همّا منقوعين في النكد - فبتكون النتيجة إيه - نكد هيجيب إيه ؟! بيجيب خمول وعجز والناس تقعد في مكانها أكتر وما تشتغلش !!!

 

[Lion84]

#تبّا_للمبادرات
-
حضرتك لو عاوز تستثمر - يبقى انتا راجل معاك فلوس - وشغّال في تجارة ما من فترة
بدأت فيها بتشيل شنطة على كتفك وبتوزّع منتجات - وبعدين عملت دكّانة في حارة - وبعدين عملت محلّ في مول - وبعدين عاوز تستثمر
-
لكن حضرتك كنت طالب في الجامعة - واتخرجت اشتغلت موظّف - وزهقت من الوظيفة - فسمعت عن مبادرة زعبلّة للاستثمار - فقلت خلاص هابقى مستثمر - إنسى
-
حضرتك متخيّل إنّ فيه ناس معاها شنط فلوس - وقاعدة تقول يا مين يشتري منّي الورد - فلقوك فايت في الشارع - فقالوا لك خد شنطة فلوس - فقلت لهم لأ - فقالوا لك تعدمني لو ما خدتهاش !!!
-
الحدّاية ما بتحدّفش كتاكيت
وبلغة خرّيجين الجامعة الأمريكيّة بيقولوا - too good to be true
-
حضرتك حتّى لو الحكومة عندها نيّة خير إنّها عاوزة تكفّر عن ذنوبها ويتبنّوك ويعطوك فلوس
-
وبفرض إنّ موظّفين الحكومة ما همّاش حراميّة - ومش عاوزين يسرقوا الفلوس عشان يروحوا يشتروا بيها فلل في الساحل
لأ همّا عاوزين يعطوها ليك انتا - عشان تسرقها انتا وتشتري انتا فيلل الساحل - أصل همّا سذّج بردو - وانتا لسّه نازل من على سجّادة الصلاة
-
يعني - بفرض إنّ الحكومة صادقة - وموظّفين الحكومة ملايكة - وانتا وليّ من أولياء الله الصالحين - فالمشروع هيفشل بردو
ليه ؟!
لإنّ موظّفين الحكومة - موظّفين - ببساطة اهي
-
المستثمر ليه مقاسات لتروس دماغه - والموظّف ليه مقاسات لتروس دماغه - دول عمرهم ما يعشّقوا مع بعض
ودا سبب فشل الحكومات على فكرة - إنّها بتتّخذ قرارات اقتصاديّة بفكر الموظّفين - فييجوا المستثمرين ما يعرفوش يشتغلوا - أو .. يعرفوا يشتغلوا .. الحكومات
-
يعني تجيب لي واحد بيه - باشا - وبدلة وكرافتّة - وتمسّكه محافظ البنك المركزيّ - فيفشل - فتعمل لي قال إيه مستغرب
-
ما هو الطبيعيّ إنّه يفشل يا بيه
ليه ؟!
لإنّه موظّف
ما انا لسّه قايل
-
يعني انتا اللي هتقول على محااااففففظظظظظظ الببببننننككككك المرررركككزززييي - ويمطّ لك في شفايفه قويّ كده - انتا اللي هتقول على محافظ البنك المركزيّ موظّف ؟!
-
أيوه أنا اللي هقول عليه موظّف - ولّا هوّا مستثمر وانا مش واخد بالي ؟!!!
ما هو يا إمّا موظّف - يا إمّا مستثمر -قول انتا
أقول إيه
قول انتا محافظ البنك المركزيّ موظّف ولّا مستثمر
#صوت_صرصور_الحقل
-
طيّب وزير الماليّة موظّف ولّا مستثمر ؟!
ما هو موظّف بردو
كان موظّف صغيّر - وبعدين بقى موظّف متوسّط - وبعدين بقى موظّف كبير - وبعيدن بقى موظّف كبير جدّا - وبعدين بقى موظّف كبير جددددا جددددددددددددددا - كبير خالص - في منتهى الكبير
-
وزير الماليّة بقى مستثمر إمتى ؟!
هوّا طول عمره موظّف - وبيكبر كموظّف - فعمر عقله ما هيفكّر كمستثمر
-
يعني هيّا الستّ لو عاشت 100 سنة هتبقى راجل - لا طبعا - هتبقى ستّ بردو - بسّ ستّ كبيرة - لكن عقلها هوّا عقل الستّ
إنتا بتتخضّ من الألقاب - أنا مالي ؟!
إنتا بتتخضّ من الألقاب عشان انتا موظّف بردو
-
أذكر مرّة كنت في الاستاد - ولقيت زمايلي بيقولوا انتا كنت فين ؟! دا وزير الشباب الرياضة كان هنا واتصوّرنا معاه
قلت لهم اتصوّرتوا مع المسؤول عن فساد الرياضة في مصر ؟!!
هيّا الناس كده - تشوف البدلة والكرافتّة - والموكب والهيلمان تتخضّ - أنا مالي
-
حضرتك كمستثمر - لو دخلت مع الحكومة في شغل - فاعرف إنّك هتتعامل مع موظّفين
-
مرّة كنت باعطي كورس في مؤسّسة حكوميّة كبيرة جدّا - وزارة بحالها - ووزارة من الوزارات اللي اسمها بيخضّ دي
فجابوا حوالي 20 جهاز كومبيوتر بالشاشة في كراتينهم من برّا - الجهاز وقتها كان تمنه حوالي 20 ألف جنيه - يعني قول 50 ألف بسعر دلوقتي - أو أكتر
في 20 - يعني جابوا كمبيوترات بحوالي مليون جنيه
حلو كده ؟!
حلو
-
رحت تاني يوم عشان اشرح - لقيتهم حاطّين الأجهزة والشاشات على الديسكات شكلها إيه - فخامة - بسّ مش شغّالة
-
مش شغّالة ليه ؟!
لإنّ كلّ ديسك جنبه فيشة واحدة - فعاوزين مشتركات عشان يوصّلوا عليها الفيشتين بتوع الكيسة والشاشة
-
فاجتمع حوالي 3 أو 4 شنبات - ببدل وكرافتّات - ووقفوا يناقشوا يا ترى هنعمل إيه في أزمة المشتركات
-
المهمّ يا معلّم - كمّلنا الكورس على الأجهزة القديمة - عشان ما جابوش مشتركات - واتركنت الأجهزة أمّ مليون جنيه !!!
-
يعني شغل الحكومة وحش يعني ؟!
لا طبعا - دا جميل - بسّ تظبّط تروسك عليه
أفضل عميل في أيّ بلد - هوّا .. البلد
-
كنت في زيارة لشركة - فصاحب الشركة قال لي - أنا بورّد كذا للحكومة
قلت له هيزهّقوك في التحصيل
قال لي ما انا مزوّد عليهم حوالي مليون جنيه ربح !! - وبقيت عارف دورة الرخامة بتاعتهم - وعندي نفس يكفيني آخد معاهم ال 3 أو 6 شهور رخامة بتوعهم لحدّ ما اجيب فلوسي
قلت له كده تمام - بسّ تبقى عارف
-
يعني المبادرات وحشة ؟!
لأ طبعا - حلوة - بسّ لمين ؟!
-
لو حضرتك بتعمل استثمار جديد - إبعد عن المبادرات - وشيل الشنطة على كتفك - وشقّ طريقك من الصفر
لو حضرتك خلاص عملت استثمارك - وسمعت عن مبادرة - خشّ يا باشا
مصر هيّا أمّك - وانتا أولى بفلوس أمّك
-
لكن دا يبقى بالتوازي مع شغلك - مش بالتوالي
يعني ما تبنيش شغلك على مبادرة - ولكن - ابنى شغلك على كتفك
وبالتوازي - لو لقيت فرصة تستفيد من مبادرة - يبقى جحا أولى بلحم طوره
-
تخيّل إنّك راجع البيت في رمضان قبل الفطار
فيه واحد بيعتمد على الناس اللي بتوزّع وجبات على الطريق
وواحد قبل ما يطلع من القاهرة بيجيب فطار ويحطّه معاه في العربيّة
المغرب أذّن - بيفطر من فطاره الشخصيّ
-
والله لقى حدّ يعطيه كيس تمر هنديّ على الطريق - كان بها - ما لقاش - هيشرب عصير جهينة اللي معاه
-
لكن واحد طالع من القاهرة من غير فطار أصلا - وبعدين معتمد على الناس اللي هتفطّره على الطريق !!!
-
فيه مبادرات بتكون خدميّة
يعني مثلا إنتا عندك مصنع بلاستيك - ومركز تكنولوجيا البلاستيك عامل دورة لأصحاب المصانع - روح الدورة دي - غالبا هتلاقيها مفيدة
-
إنتا عندك مصنع أجهزة منزليّة - والمجلس التصديريّ للصناعات الهندسيّة عامل معرض لمستوردي الأجهزة المنزليّة من أفريقيا ييجوا يقعدوا في فندق هنا - ويقابلوا مصانع الأجهزة المنزليّة اللي بتستهدف التصدير - إشترك في المعرض ده
-
مركز تحديث الصناعة عامل مبادرة لمنح شهادة ( بكلّ فخر صنع في مصر ) مثلا - بالتعاون مع الوكالة الألمانيّة للحاجات الحلوة - إشترك - هيساعدوك تظبّط مصنعك وتأهّله ياخد الشهادة
-
فكلّ دا إنتا بتعمله بالتوازي مع شغلك
لكن مبادرة من الصفر كده - فهيّا اشتغالة - وهمّا محتاجين حضرتك ياخدوا بيك اللقطة وخلاص