طب نعيد تاني في بديهيات المفروض انها معروفة للجميع، بس معلش نيجي على نفسنا ونعيدها ..
تسمع عن كتاب البوابات؟
متعرفوش؟ هحكيلك عليه، كتاب البوابات ده هو نص مصري قديم مقدس، بيتكلم عن رحلة الروح في ساعات الليل، المنظور المصري القديم للآخرة يعني وان كل روح للمتوفي حديثا بتعدي من بوابة عليها إله والمفروض يعدي بكل بوابة بنجاح، قصة كدة ملناش دعوة بيها.
النص ده ميهمناش، اللي يهمنا ان فيه جزء مهم جدا اسمه "الاعراق البشرية الاربعة"، يعني ايه الكلام ده؟
يعني المصري القديم في النص ده، في وقتها من الاف الاعوام، حدد الاعراق البشرية المختلفة من وجهة نظر مصرية ورسمهم بشكل مفصل وفصلهم عن بعض، ورسم تمثيل لكل عرق ومكانه جغرافيا، ورسمها على جدران معابده ومقابره في الفترة من اول حورمحب لحد رمسيس السابع، الفترة مابين الاسرة ال١٨ لحد الاسرة ال٢٠ او الفترة اللي كان بيحكمها تحالفات وزواج بين اعداء مصر الحدودية وقتها، جميل الكلام؟
فا هتلاقي انه رسم اربع اعراق مختلفة، بالترتيب ده في كل مقابر الاسرة الحديثة وهم كالتالي :
- "تمحو" الليبي او شمال افريقي وده بشرته فاتحة وحاطت وشم وعلى راسه ريش ومشابك
- "نحسو" النوبي حتى افريقيا وده اللي بشرته داكنة وملامحه تميل للقارة الافريقية ولابس من جلد الحيوانات
- "عامو" الاسيوي او العربي او الشامي وده بشرته فاتحة وملتحي ولابس مئزر ملون
- "ريث" او المصري العادي اللي زينا وده القمحي اللون ولبسه مصري زي مهو واضح كدة
الصور دي موجودة بنفس الشكل كدة تبع نص البوابات في كل مقابر الاسرة الحديثة، والسبب في ذكرهم هو تذكير مصر بأعدائها وقتها وشمول رحمة الملك "تحت وصاية الاله" للمناطق دي بأعراقها المختلفة، املا منه في اجتناب شرهم وضمهم لملكه يعني، في فترة المعاهدات والسلام.
- طيب مصر حكمها افارقة سود البشرة؟ اه، اسرة رقم ٢٥ المصرية هيا اسرة كوشية فعلا، موقعهم كان نبتة في شمال السودان، حكموا مصر "جزئيا" في فترتها الانتقالية الثالثة في لحظة ضعف اواخر عهد المصريين القدماء سنة ٧٤٤ ق.م، الا انها اتأثرت بمصر مش العكس، قلدتها واقتدت بيها وبنت اهرامات شبة اهرامات مصر في السودان "اهرامات مروى"، ومستمرش الحكم لفترة طويلة بسبب انتصار الاشوريين عليهم "الاسرة ٢٦" وفي النهاية طردهم الاتنين الملك المصري "بسماتيك الاول" قبل غزو الفرس بكام سنة بس يعني بعد المعابد والاهرامات وعظمة المصريين القدماء بآلاف الاعوام.
نيجي للكلام المهم ..
- الافروسنتريك والهري بتاع كيفين هارت والجو ده، اختراع امريكي صرف، عملوه ودعموه القرن اللي فات عشان يحاولوا يصلحوا شوية من القرف اللي عملوه في فترة السخرة الافريقية في امريكا والتعذيب والتفرقة العنصرية والحرب الاهلية الامريكية خلال القرن ال١٩.
- بيدفعوا ملايين عشان يزيفوا التاريخ ويخترعولهم حضارة على حسابنا، ويفرضوا علينا سياسة "اللون"، مع ان الحضارة المصرية القديمة اصلا معتمدتش لون او عنصرية بسبب لون في تاريخها كله، انما كانت منفتحة على الاختلافات الثقافية، بس مدام الاختراع غربي، يبقا لازم يمشيك غربي.
- خطورة موضوع الافروسنتريك ده ان صوتهم بقا عالي ومسموع، ومبقوش يتكلموا في الضل لكن وصلت بيهم البجاحة انهم يعلنوها علنا في المناطق الاثرية المصرية، واحد زي كيفين هارت جي يعمل حفلة في ستاد القاهرة، في قلب العاصمة، وقبله كانوا عايزين يعملوا مؤتمر هنا في اسوان، وبقا فيه شبة اقتناع تام ان احنا غزاة عرب، وان الافارقة هما اللي بنوا الحضارة المصرية واحنا طردناهم.
- الافروسنتريك مش خاصة بالمصريين بس، انما خاصة بكل حضارات العالم القديم، لدرجة انهم سنة ٢٠١٥ اقتحموا السفارة المغربية في فرنسا مطالبين بطرد المغاربة من ارض المغرب لانهم "عرب وامازيغ" وسرقوا حضارة قرطاج "الافريقية" على حد زعمهم.
- القبول بوجودهم وانتشار افكارهم ودعم حفلاتهم في مصر هنا، بدون رد فوري من المسئولين، اسمه تخاذل واستسهال، والغاء لفكرة وجود مصري، والمفروض اننا ننتج افلام وكتب ومجلات تعريفية وافلام وثائقية اسهل واوضح للتعريف بعظمة الحضارة المصرية للعوام مش المتخصصين، الخطر دايما بيكون من العوام، الكتلة اللي بتحرك الساكن، وارجو من المسئولين الاهتمام بالقضية دي بدل ما ييجي اليوم اللي نلاقي فيه هجرات جاية تطالب بحق مش حقها في بلدنا.
- الاهرامات والحضارة المصرية القديمة كلها، بناها المصريين بأيادي مصرية، لا قوم عاد، ولا فضائيين، ولا افارقة ولا خلافه، فقط مصريين، مع الاعتراف بوجود تنوع عرقي في مصر لاننا شعب معرفناش سخافات الغرب وتفريق لوني وعرقي، احنا احسن منهم، ومتسمحش لحد يلعب في اhttps://www.facebook.com/1154504260/posts/pfbid02d9a7MZdVwYT8YzHby4ThGedkTQmhAX5aB6KHfjMfYHvzpKfBpvAd6HFko9Kj7KaTl/فكارك، مصر للمصريين فقط، وشكرا ❤️